عبد الله الحمياني's video:

https://twitter.com/abdm7771/status/953555654140157952 وسط الظلام ونيرة الفرس مطفاه = طاحت على كسرى شراف محسوبه وجا فالمنام ان الاعاريب تنصاه = مستجنبينٍ كل قباً طلوبه ووسط الظلام ببطن مكه من أعلاه = أمٍّ تمخّض واول الليل دوبه جابت غلامٍ كل الأديان تتناه = عيسى وموسى فالكتاب أخبروبه يابعد ذكره فالمخاليق بعداه = اليا انقطع جيلن بجيلن حكوبه زفوا لجده طلعة الصبح بشراه = ثم لبني سعد ابن بكر ارسلوبه اربع سنين اللي قضاهن بمرباه = والخامسه ينشق صدره وجوبه والسادسه وآشيبي ان قال يامّاه = وامه بقبر بعيد ماعلّموبه واغزوه عمّانه نهار المثاراه = مكملٍ عشرين ليلة غزوبه 10- وِ اِلْه اربعينٍ يوم جبريل قرّاه = وعقب ثلاث سنين هبت هبوبه ونادى على سفح الجبل وآصباحاه = إني نذير وكلهم كذبوبه الشوك يوضع له على طول ممشاه = واليا دعاهم بالمجالس هزوبه هاشم تحامي عنه ولوي تشناه = لوي لولا هاشمن روحوبه اليا تناخوا بالجدود المسماه = عيا على الاسلام سلم العروبه وامسى بوج ولالقابه مراواه = زودٍ على تغريبته غربوبه تشيب عيني كل ماوحيت شكواه = يشكي على رب الملا ماينوبه ومن عقب عشر سنين ثوّر مطاياه = من سفح ثور منوّخاتٍ جنوبه يبغا الشمال ودار الانصار طرياه =ومن دونها الطود الحجازي ولوبه وفهر ابن مالك والاحابيش تقفاه = وليثٍ ومدلج قاضبينٍ دروبه 20- وراح الدليله عن بني بكر يحداه = مِطْريه كعب وموثقٍ عاهدوبه خلا سراوع غرب مدري تمثناه= دربه بهاك الشق مافصّلوبه وعسفان راهٍ ماه والدرب ياطاه = خلاه عنهم شرق ماشرّعوبه وجمدان والنقرا نسفهن بيسراه = وغران والهضب الحمر يمنوبه واصبح قديد وخبرت عنهم الشاه = درت لبن والشاة ماهي حلوبه ولحق سراقة فوق قَبّاً مغذاه = مِرخٍ رسنها فوقهم وعثروبه خلوه في دوران يوم الله انجاه =ومروا مسيل القاحه وسنّدوبه والأسلمي مع اول الركب يقداه = معطن يسار الخلص وايمن ركوبه عدّابهم نقبٍ عسيرن معدّاه = وورقان عن ضلعان قدس فرقوبه وامسى النبي في بطن ريمٍ معشّاه = متقطعه عنه المطاليب نوبه 30- واصبح بدار اهل السطر والمحاماه = زبن المضيم ليا انطلق زر ثوبه وضجّت يهود وراجعت كل توراه = وانه على ما الانبيا وصّفوبه واستكبروا عن طاعته بالمعاداه = طبعٍ قديم جدودهم ورثوبه أول سنه من هجرته شيّد بناه = بيّن مواجيب الاثم والمثوبه والثانية في بدر جات الملاقاه = أبو جهل جاهم تقوده ذنوبه ماينعذل يوم الركيّب تعداه = والله رماه بنحرهم وقطعوبه وحمزه ذبح شيبه وعتبه بيمناه = والعاص من ظهر الفرس حولوبه وسبعين فارس منهم انتثرت دماه = وسبعين فارس يم اهلهم سروبه والثالثه جاته كنانه تقاضاه = في يوم أحد يوم الرماه اخلفوبه شجوه وادموا وجنتيه و ثناياه = والجيش ولّى والعدا حوطوبه 40- ياليتني يوم ادبح الجيش ويّاه = فيّ من ضروب الحرب فدوة ضروبه اما فعلت وشاف فعلي بعيناه = والا انهزمت وبشر الله بتوبه والرابعه حي النضير أعلن عداه = والله كفاه المقتل اللي نووبه والخامسه جت خيل الاحزاب تبغاه = باربع قبايل من نزار مهيوبه يحفر مع اصحابه بمعول و مسحاه = واليا قريظه من وراه محزوبه والريح لى مرت على القدر تكفاه = والله نصر عبده بعد شرّهوبه والعصر ما كلٍّ على الوقت صلاه = و حيي فالميدان شقق جيوبه والسادسه سيّر على ضو روياه = على الحديبيه نزل وصلحوبه والسابعه خيبر وطتها سراياه = يابا الثريا يوم يعلن حروبه والثامنه نادى وورى بمغزاه = في فتح مكه صبح ولا دروبه 50- اخوٍ كريم والعفو من سجاياه = قال "اذهبوا" ماكنهم عزروبه وعليا هوازن جات بالجيش تشعاه = والظعن من راس الشفا حدّروبه مالك يقود الجمع ودريد ينهاه = وحنين سالت بالكتايب دعوبه والخيل من جا في نحرها توطّاه = والهجن راحت بالرجال مغلوبه من قايلن ياكثرنا اليوم كثراه = الكلمه اللي جا باثرها صعوبه قام النبي يشهر بنفسه وبآباه = عن ماقفه يبطون مازحزحوبه وعمه ينادي في قفا اهل المواساه = واطرا على الابطال مابايعوبه والتاسعه جات القبايل ترضاه = كل الاعاريب اسلموا واهتدوبه والعاشره شهّد على الامه الله = بلغ رسالاته وكمّل وجوبه والحاديه جا داعي الموت ينعاه = وجدي على الاصحاب يوم فجعوبه 60- هذي شواهد سيرته جعلي فداه = هذا اختصار اللي العرب حدثوبه من ليلة الاثنين والمولد اياه = لى ليلة الاثنين يوم دفنوبه صلى عليه الله وسلم وزكّاه = وآله وصحبه والذين اقتدوبه