Habari za UN's video: Kapteni Cecilia mshindi wa tuzo ya UN

Hii leo katika makao makuu ya Umoja wa Mataifa Katibu Mkuu wa umoja huo Antonio Guterres amemtangaza Kapteni Cecilia Erzuah kutoka Ghana kuwa mshindi wa tuzo ya kila mwaka ya Mchechemuzi wa Masuala ya jinsia kwenye operesheni za ulinzi wa amani za Umoja wa Mataifa. Katika tukio hilo lililofanyika kwenye makao makuu ya Umoja wa Mataifa, Bwana Guterres amesema Kapteni Erzuah ameibuka kidedea kutokana na mchango wake kama mlinda amani wa kijeshi kwenye ujumbe wa mpito wa Umoja wa Mataifa huko Abyei eneo lililo katikati ya Sudan na Sudan Kusini, ambako baada ya kuona madhila yanayokumba jamii hususan wanawake kwenye mizozo amechagiza kuona wanawake wanajumuishwa na wanashiriki kwa dhati kwenye michakato ya amani.