Kashmiri کشمیری Sufism صوفی اِزم's video: wala Bombro Loli Manz Karai Hov Hov Ahad Zargar

wala Bombro Loli Manz Karai Hov Hov Kalaam Ahaz Zargar Singer Ghulam Ahmad Sofi مۄلہٕ یمبرزل وأجتھس زۄلہٕ چَھمنو وۄلہٕ بۆمبرو لۄلہِ منز کرٕیو ہو پھۄلہٕ تیٚلہِ ییٚلہِ یکجا سمَو ژٕ تہٕ بو وۄلہٕ بۆمبرو لۄلہِ منز کرٕیو ہو لٔج مانہٕ ریٚنہِ زانہٕ ریٚنہِ سٕتۍ مان مان شانہٕ بجہٕ ہیۆت ژھانڈُن پانہٕ مزٕمان خانہٕ پنن.ے جانانہٕ کھانہٕ رنٕیو وۄلہٕ بۆمبرو لۄلہِ منز کرٕیو ہو کتھہٕ بوٗزِتھ گتہٕ ریٚنہِ گۆنڈنم جوش ستہٕ ؤرۍشے کتہِ روٗد حال تَے ہوش اتھ نارس پَتھ وارٕ گَتھ کرٕیو وۄلہٕ بۆمبرو لۄلہِ منز کرٕیو ہو تاجہٕ شاہی راجہٕ ریٚنہِ چُھم سیاه فام راجہٕ پورٕ منزٕ خواجہٕ سُند آم پیغام باجہٕ نَے چَھے وزاں تَتہِ راتھ کیوت دۄہ وۄلہٕ بۆمبرو لۄلہِ منز کرٕیو ہو جامہٕ زیبا لأگتھ چُھم بہادوٗر کامہٕ دیو سٕنز تن چَھم زن کافوٗر دامہٕ لأجتَھس گأجتَھس شامہٕ سۄندرو وۄلہٕ بۆمبرو لۄلہِ منز کرٕیو ہو شاہ سۄندرن گندرن تھوو ارمان شاہ بندرن پھیراں لأل مرجان شاہ یندرن چھندرأوۍ شیرِ ببرو وۄلہٕ بۆمبرو لۄلہِ منز کرٕیو ہو پۆر ہوٗ ہوٗ ژۆر گوو نارِ انفاس کۆر نوٗرن حورن سٕتۍ اخلاص تۆر ذرٕ ذرٕ تمہِ کُے پَے ہرسو وۄلہٕ بۆمبرو لۄلہِ منز کرٕیو ہو شاہ باغس منز ژاو پأز رفتار شاہ پٔرۍیہِ آسہٕ ونہٕ واں جاناوار شاہ بازس نألۍگٔیم زألۍ گیسو وۄلہٕ بۆمبرو لۄلہِ منز کرٕیو ہو بدوالجمالہِ جدول ہیژ بردوش رنگہٕ ول چھم کراں ژھل گوس بیہوش اچِھول چُھم بِہِتھ گچھِ ڈبہِ روبرو وۄلہٕ بۆمبرو لۄلہِ منز کرٕیو ہو پایہِ بٔڈۍسٕے ژھانڈنہِ درایہِ مستور جایہِ خلوت وایاں ساز و سنطور مایہِ چانے میہ دٔرۍمٕتۍ آیہِ بوزتو وۄلہٕ بۆمبرو لۄلہِ منز کرٕیو ہو راتھ ظلمات زلفس سٕتۍ ہم رنگ ذات و صفات ساتھ بارنگ بیرنگ ساتھ سنگلات ژٔٹۍ مےٚ گوم عشقہٕ جادو وۄلہٕ بۆمبرو لۄلہِ منز کرٕیو ہو احد زرگر پھۄلہٕ ناو دِلکُے پوش دمہٕ دمہٕ کر خونس پننِس نوش ادٕ اصلٕکہِ وصلُک پیالہٕ بریو وۄلہٕ بۆمبرو لۄلہِ منز کرٕیو ہو کلام احد زرگر صاحب گلوکار غلام احمد صوفی