Keralakaumudi News's video: Taliban terrorists enjoying rides at an amusement park in Kabul after seizing the country

'യുദ്ധം ജയിച്ചു, തേടിയത് ഞങ്ങള്‍ നേടി, രാജ്യത്തിന്റേയും ജനങ്ങളുടേയും സ്വാതന്ത്ര്യമാണ് ഞങ്ങള്‍ ആഗ്രഹിച്ചത്'അഫ്ഗാനിസ്താനില്‍ ആധിപത്യം ഉറപ്പിച്ച ശേഷം താലിബാന്‍ പ്രതികരിച്ചത് ഇങ്ങനെ. യുദ്ധം ജയിക്കുക എന്നത് ആഹ്ളാദിക്കേണ്ടതിന്റേയും ആഘോഷിക്കേണ്ടതിന്റേയും സന്ദര്‍ഭം തന്നെ. അഫ്ഗാനികളും ഇതരരാജ്യക്കാരും സുരക്ഷിതത്വം തേടി നെട്ടോട്ടമോടുമ്പോള്‍ താലിബാന്‍ അംഗങ്ങള്‍ വിജയാഘോഷത്തിലാണെന്ന് സൂചിപ്പിക്കുന്ന വീഡിയോകളും ചിത്രങ്ങളും പുറത്തു വന്നു തുടങ്ങിയിരിക്കുന്നു. രാജ്യം പിടിച്ചെടുത്തതിന് പിന്നാലെ കുട്ടികളുടെ പാര്‍ക്കില്‍ സമയം ചെലവഴിച്ച് താലിബാന്‍ ഭീകരര്‍. കാബൂളിലെ ഒരു അമ്യൂസ്‌മെന്റ് പാര്‍ക്കിലെ റൈഡുകള്‍ താലിബാന്‍ ഭീകരര്‍ ആസ്വദിക്കുന്ന വീഡിയോയാണ് പുറത്ത് വന്നിരിക്കുന്നത്. പാര്‍ക്കിലെ കാറുകളില്‍ കുട്ടികളെ പോലെ സന്തോഷിക്കുകയാണവര്‍. രാജ്യം പിടിച്ചെടുമ്പോള്‍ ഏത് തീവ്രവാദിക്കും എല്ലാം സ്വന്തമാണല്ലോ. ചെറിയ കുട്ടികള്‍ക്ക് വേണ്ടി നിര്‍മ്മിച്ച പാര്‍ക്കാണ് ഇത്. ഇവിടം പൂര്‍ണമായും താലിബാന്‍ ഭീകരരുടെ നിയന്ത്രണത്തിലാണെന്ന് വീഡിയോയില്‍ നിന്ന് വ്യക്തമാണ്. കുഞ്ഞുങ്ങള്‍ക്കുള്ള ഇലക്ട്രിക് ബമ്ബര്‍ കാറുകള്‍ ഭീകരര്‍ ഓടിക്കുന്ന വീഡിയോയാണ് ആദ്യത്തേത്. എല്ലാവരുടേയും ഒരു കയ്യില്‍ തോക്കും ഉണ്ട്. ചുറ്റും നില്‍ക്കുന്ന മറ്റ് ഭീകരര്‍ ഇവര്‍ക്ക് പ്രോത്സാഹനം നല്‍കുന്നതും ദൃശ്യങ്ങളില്‍ വ്യക്തമാണ്. ഭീകരര്‍ വട്ടത്തില്‍ കുട്ടിക്കുതിരകള്‍ ഓടിക്കുന്ന വീഡിയോയാണ് മറ്റൊന്ന്. രാജ്യത്തിന്റെ എല്ലാ മേഖലകളും സാധാരണക്കാര്‍ക്ക് മുന്നില്‍ കൊട്ടിയടച്ചാണ് അഫ്ഗാനില്‍ താലിബാന്‍ ഭരണം കയ്യടക്കിയിരിക്കുന്നത്. അഫ്ഗാനില്‍ നിലനില്‍ക്കുന്ന ഭീകരാന്തരീക്ഷത്തില്‍ നിന്ന് തികച്ചും വിപരീതമായ സാഹചര്യത്തില്‍ കാണപ്പെടുന്ന താലിബാന്‍ തീവ്രവാദികള്‍ വീഡിയോ കാണുന്നവരെ അമ്പരപ്പിക്കുന്നു. വിമാനത്താവളത്തിലേക്ക് ഇരച്ചെത്തുന്നവരും റണ്‍വേയിലൂടെ കിതച്ചോടുന്നവരും വിമാനങ്ങളില്‍ തൂങ്ങി രക്ഷപെടാന്‍ ശ്രമിക്കുന്നവരും വീണുമരിച്ചവരുടെ കാഴ്ചകളും നൊമ്പരമുണര്‍ത്തുമ്പോള്‍ ആഘോഷത്തിമിര്‍പ്പില്‍ മുഴുകുന്ന താലിബാന്‍ അംഗങ്ങള്‍ അമ്പരിപ്പിക്കുന്ന കാഴ്ച തന്നെയാണ്.