Murage Mwiza's video: Bana b u Rwanda tuzahora iteka tubibuka

Twibuke umunsi wanze kwira Twibuke ijoro ryanze gutana Ijosi ryibasiwe bitavugwa Igihugu cyuzuye imiborogo Ubwoko bwahindutse icyaha Twibuke bya bihe bitavugika Umuntu arengwa n'ibyo areba Nta murengezi abona n'umwe Hirya bicanwa n'uwabahishe Muhendahenda ngo mwicwe vuba. Twarabakundaga turababura Ikivi cyanyu tuzacyusa Bana b'u Rwanda Tuzahora iteka tubibuka. Mwarahizwe bimwe by'inkware Mwazize ubwoko mutahanze Akarere, ishyaka cyangwa isura Hali n'abaziraga umutungo U Rwanda rwacu rwaragowe. Abanyamahanga, uburo buhuye Bali baje bakangata N'intwaro nyinshi nk'izitabaye Nyamara mwahotowe bareba Babura, baje bimwe bigayitse. Twarabakundaga turababura Ikivi cyanyu tuzacyusa Bana b'u Rwanda Tuzahora iteka tubibuka. Intango y'ishyano yabaye urupfu Bene Rwanda bapfa bahagaze Gucura inkumbi biba nk'umulimo Abashakanye baratemana Abana bicwa n'abababyara Twarapfushije abanyabwenge Imanzi zitangiraga abandi Ba basaza buje inama Na ba bakecuru b'impanuro Barapfuye, n'abari mu nda. Twarabakundaga turababura Ikivi cyanyu tuzacyusa Bana b'u Rwanda Tuzahora iteka tubibuka. Twabuze abantu, tubura ibintu U Rwanda rwacu rusubira inyuma Ya majyambere yarasenywe Ya mashuli, ya mavuliro Nta n'uwabivuga ngo abiheze Icyabishe nticyaruretse U Rwanda rwacu ruteze amaboko Ngo turugarure, birashoboka Hafi aha, duhige ineza Kandi Imana ifasha abatwaza. Twarabakundaga turababura Ikivi cyanyu tuzacyusa Bana b'u Rwanda Tuzahora iteka tubibuka. Niba tuyobowe n'urukundo Imfubyi zareka kwigunga Ibimuga n'abapfakazi baseke Abasizwe iheruheru bamenywe Amaganya yimuke, twizere. Niba tuyobowe n'ubutwari Umunyabyaha azareke guhaba Atange icyiru yiruhutse Ukuli kuzabohore imitima U Rwanda rwongere guhehera. Twarabakundaga turababura Ikivi cyanyu tuzacyusa Bana b'u Rwanda Tuzahora iteka tubibuka. Bana b'u Rwanda Tuzahora iteka tubibuka. (Twarabakundaga/Duhore Tubibuka ~ Dieudonné Munyanshoza, Rwanda)