Keralakaumudi News's video: Indian Air Force evacuates ambassador staff and ITBP personnel from Afghanistan

പല എംബസികളും പ്രവര്‍ത്തിക്കുന്ന ഗ്രീന്‍ സോണിലാണ് ഇന്ത്യന്‍ എംബസിയും പ്രവര്‍ത്തിച്ചിരുന്നത്. അഫ്ഗാനില്‍നിന്നുള്ളവര്‍ക്ക് ഇന്ത്യയിലേക്ക് യാത്രചെയ്യാനാവശ്യമായ വീസ ഇടപാടുകള്‍ നടത്തിയിരുന്ന സാഹിര്‍ വീസ ഏജന്‍സിയില്‍ താലിബാന്‍ പരിശോധന നടത്തി. തിങ്കളാഴ്ച 45 ഇന്ത്യക്കാരെയാണ് ആദ്യത്തെ വിമാനത്തില്‍ കൊണ്ടുവരാന്‍ നീക്കം നടത്തിയത്. എയര്‍പോര്‍ട്ടിലേക്കുള്ള യാത്രാ മധ്യേ ഇവരെ താലിബാന്‍ തടഞ്ഞുവയ്ക്കുകയും സാധനങ്ങള്‍ പിടിച്ചെടുക്കുകയും ചെയ്തു. പിന്നീട് വിട്ടയച്ചെങ്കിലും കാബൂള്‍ എയര്‍പോര്‍ട്ടില്‍ നിന്നും ഉദ്യോഗസ്ഥരെ വിമാനത്തില്‍ കൊണ്ടുവരിക എന്നതും കനത്ത വെല്ലുവിളിയായിരുന്നു. ആയിരക്കണക്കിന് അഫ്ഗാന്‍ പൗരന്‍മാരാണ് രാജ്യം വിടാനായി എയര്‍പോര്‍ട്ടില്‍ തടിച്ചുകൂടിയത്. ഇതിനിടയിലൂടെ ഒരുവിധത്തിലാണ് ഇന്ത്യന്‍ വിമാനം വിമാനത്താവളം വിട്ടത്. ആള്‍ക്കൂട്ടം മൂലം വിമാനത്താവളം അടതോടെ രണ്ടാമത്തെ വിമാനം പുറപ്പെടാന്‍ തിങ്കളാഴ്ച സാധിച്ചില്ല. യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കനും ഇന്ത്യന്‍ വിദേശകാര്യ മന്ത്രി എസ്. ജയ്ശങ്കറും രാത്രി ചര്‍ച്ച നടത്തിയതിനെത്തുടര്‍ന്നാണ് ബാക്കിയുള്ള ഇന്ത്യക്കാരെ ഇന്നു രാവിലെ കാബൂള്‍ എയര്‍പോര്‍ട്ടില്‍നിന്നും രക്ഷിക്കാനായത്. സ്ഥാനപതി രുദ്രേന്ദ്ര ടണ്‍ഠന്‍ ഉള്‍പ്പെടെ 120 പേരെ രണ്ടാമത്തെ വിമാനത്തിലാണ് രക്ഷപ്പെടുത്തിയത്. രാവിലെ 11 മണിയോടെ ഇവരെ ഗുജറാത്ത് ജാംനഗര്‍ വിമാനത്താവളത്തില്‍ എത്തിച്ചു.മലയാളികള്‍ അടക്കം 1500 ഇന്ത്യക്കാരാണു കാബൂളില്‍ കുടുങ്ങിക്കിടക്കുന്നത്. കൂടുതല്‍ വിമാനങ്ങള്‍ ദൗത്യത്തിനു സജ്ജമായി സേനാ താവളങ്ങളിലുണ്ട്. കുടുങ്ങിക്കിടക്കുന്നവരുമായി ബന്ധപ്പെടുന്നുണ്ടെന്നും എല്ലാവരെയും തിരികെയെത്തിക്കുമെന്നും വിദേശകാര്യ മന്ത്രാലയം വ്യക്തമാക്കി